यज्ज्ञात्वा न पुनर्मोहम्...

गीतोपदेशः

यज्ज्ञात्वा न पुनर्मोहमेवं यास्यसि पाण्डव ।

येन भूतान्यशेषेण द्रक्ष्यस्यात्मन्यथो मयि ॥ ३५ ॥

पदच्छेदः

यत् ज्ञात्वा न पुनः मोहम् एवं ज्ञास्यसि पाण्डव येन भूतानि यशेषेण द्रक्ष्यसि आत्मनि अथो मयि ॥ ३५ ॥

अन्वयः

पाण्डव ! यत् ज्ञात्वा पुनः मोहम् एवं न यास्यसि । येन आत्मनि भूतानि अशेषेण द्रक्ष्यसि । अथो मयि । (तत् ज्ञानं तत्त्वदर्शिनः ते उपदेक्ष्यन्ति ।)

पदार्थः

पाण्डव = पाण्डुपुत्र !

यत् ज्ञात्वा = यत् विज्ञाय

पुनः = भूयः

मोहम् = व्यामोहम्

एवम् = इत्थम्

न यास्यसि = न गमिष्यसि

येन = येन ज्ञानेन

आत्मनि = स्वस्मिन्

भूतानि = प्राणिनः

अशेषेण = समग्रम्

द्रक्ष्यसि = पश्यसि

अथो = अनन्तरम्

मयि = भगवति ।

तात्पर्यम्

अर्जुन ! येन ज्ञानेन भवान् पुनः एतादृशं मोहजालं न आप्नोति, येन आत्मज्ञानेन समवायबुद्ध्या स्वस्मिन् मयि च सर्वान् जीवान् द्रष्टुं शक्नोति तादृशं ज्ञानं तत्त्वदर्शिनः ते उपदेक्ष्यन्ति ।