श्रेयान्द्रव्यमयाद्यज्ञात्...

गीतोपदेशः

श्रेयान्द्रव्यमयाद्यज्ञाज्ज्ञानयज्ञः परन्तप ।

सर्वं कर्माखिलं पार्थ ज्ञाने परिसमाप्यते ॥ ३३ ॥

पदच्छेदः

श्रेयान् द्रव्यमयात् यज्ञात् ज्ञानयज्ञः परन्तप सर्वं कर्माखिलं पार्थ ज्ञाने परिसमाप्यते ॥ ३३ ॥

अन्वयः

परन्तप ! द्रव्यमयात् यज्ञात् ज्ञानयज्ञः श्रेयान् । पार्थ ! सर्वं कर्म ज्ञाने अखिलं परिसमाप्यते ।

पदार्थः

परन्तप = शत्रुतापक !

द्रव्यमयात् = द्रव्यसाध्यात्

यज्ञात् = यागात्

ज्ञानयज्ञः = आत्मज्ञानरूपो यज्ञः

श्रेयान् = वरीयान्

पार्थ = अर्जुन !

सर्वम् = समस्तम्

कर्म = यज्ञरूपं कर्म

ज्ञाने = आत्मज्ञाने

अखिलम् = फलसहितम्

परिसमाप्यते = पर्यवस्यति ।

तात्पर्यम्

हे अर्जुन ! सांसारिकवस्तुभिः सिद्धात् यज्ञात् आत्मज्ञानरूपो यज्ञः श्रेष्ठः भवति । यतः सर्वाणि कर्माणि ज्ञाने एव परिसमाप्तिं गच्छन्ति, फलत्वात् ।