अथ (अनन्तरम्)

अव्ययेषु अन्यतमं भवति इदम् अव्ययम् अथ इति ।

अर्थविवरणम्

अथ इति शब्दः नाना अर्थेषु वर्तते । यथा -

मङ्गलानन्तरारम्भप्रश्नकार्त्स्न्येष्वथो अथ ।
अर्थात् अथशब्दः मङ्गलम्, अनन्तरम्, आरम्भः, प्रश्नः, कार्त्स्न्यम् इत्येतेषु अर्थेषु प्रयुज्यते ।

उदाहरणवाक्यानि

• अथातो ब्रह्मजिज्ञासा ।
• अथ शब्दानुशासनम् ।
• स्नानं कृत्वाथ भुञ्जीत ।
• अथ वक्तुं समर्थस्त्वम् ?
• अथ क्रतून् ब्रूमः ।
• अथ स्नानविधिः ।
• अथ इमं वेदमध्यापय अथ एनं छन्दोऽपि ।

अभियुक्तोक्तिः

अथशब्दविषये अभियुक्तोक्तिः काचिद्विद्यते -

ओङ्कारश्चाथशब्दश्च द्वावेतौ ब्रह्मणः पुरा ।
कण्ठं भित्त्वा विनिर्यातौ तस्मान्माङ्गलिकावुभौ ॥

अर्थात् - पुरा कदाचित् ब्रह्मणः कण्ठं भित्त्वा ॐकारः अथ इति शब्दश्च बहिरागतौ । ब्रह्मणः मुखात् बहिरागतौ इत्यस्मात् तयोः मङ्गलत्वम् ।

सम्बद्धाः लेखाः

• अव्ययम्
• संस्कृतम्
• व्याकरणम्