मच्चित्तः सर्वदुर्गाणि...
श्लोकः
[सम्पादयतु] | अयं लेखः विकिपीडिया-विश्वकोषस्य अन्यलेखैः सह संयोजनीयः । सन्दर्भानुगुणं परिसन्धयः योज्यन्ताम् । तेन (जनुवरि २०१४) |
- मच्चित्तः सर्वदुर्गाणि मत्प्रसादात्तरिष्यसि ।
- अथ चेत्त्वमहङ्कारान्न श्रोष्यसि विनङ्क्ष्यसि ॥ ५८ ॥
अयं भगवद्गीतायाः अष्टादशोऽध्यायस्य मोक्षसंन्यासयोगस्य अष्टपञ्चाशत्तमः(५८) श्लोकः ।
पदच्छेदः
[सम्पादयतु]मच्चित्तः सर्वदुर्गाणि मत्प्रसादात् तरिष्यसि अथ चेत् त्वम् अहङ्कारात् न श्रोष्यसि विनङ्क्ष्यसि ॥ ५८ ॥
अन्वयः
[सम्पादयतु]मच्चित्तः मत्प्रसादात् सर्वदुर्गाणि तरिष्यसि । अथ त्वम् अहङ्कारात् न श्रोष्यसि चेत् विनङ्क्ष्यसि ।
शब्दार्थः
[सम्पादयतु]- मच्चित्तः = मदन्तःकरणः
- मत्प्रसादात् = मदनुग्रहात्
- सर्वदुर्गाणि = सकलदुःखानि
- तरिष्यसि = अतिक्रमिष्यसि
- अथ चेत् = यदि पुनः
- अहंकारात् = अहम्भावात्
- न श्रोष्यसि = न अवधारयसि
- विनङ्क्ष्यसि = विनाशं गमिष्यसि ।
अर्थः
[सम्पादयतु]यदि मयि एव मनः स्थापयसि तर्हि सर्वाण्यपि दुःखानि अतिक्रमितुं शक्नोषि । अथ अहमपि ज्ञानी इति अहंकारात् मदुक्तं न शृणोषि तर्हि अवश्यम् अधःपतनं प्राप्नोषि ।