आमलकम् (आहारपदार्थः)
.jpg)
एतत् आमलकम् अपि भारते वर्धमानः कश्चन वृक्षविशेषः । इदम् आमलकम् अपि सस्यजन्यः आहारपदार्थः । एतत् आमलकम् आङ्ग्लभाषायां Gooseberry इति उच्यते । एतत् आमलकं भारते सर्वत्र उपयुज्यते । आमलकं यथा आहारत्वेन उपयुज्यते तथैव औषधत्वेन अपि उपयुज्यते । अनेन आमलकेन निर्मितः अवलेहः सुप्रसिद्धः एव । अनेन आमलकेन लेह्यम्, उपसेचनं चापि निर्मीयते । तथैव अपि आमलकस्य खादनं शक्यते ।
आयुर्वेदस्य अनुसारम् अस्य आमलकस्य स्वभावः
[सम्पादयतु]एतत् आमलकम् आम्ल – मधुर – मिश्रित - रसयुक्तम् । एतत् शीतवीर्ययुक्तं, रुचिकरं च ।
- “कषायं कटुतिक्ताम्लं स्वादु चामलकं हिमम् ।
- रसं त्रिदोषहृद् वृष्यं ज्वरघ्निं च रसायनम् ॥
- हन्ति वातं तदाम्लत्वात् पित्तं माधुर्यशैत्यकः ।
- कफं रूक्षकषायत्वात् फलं धात्र्यास्त्रिदोषजित् ॥“
- १. एतत् आमलकं त्रिदोषान् परिहरति ।
- २. आमलकं वीर्यवर्धकं, मलप्रवृत्तिकारकं च ।
- ३. आमलके पञ्चरसाः सन्ति । कषायः, कटुः, तिक्तः, आम्लः, मधुरः च । अस्मिन् आमलके षड्रसेषु लवणरसः केवलं नास्ति ।
- ४. आमलकं ज्वरहरं, शरीरस्य सप्तानाम् अपि धातूनां पोषकं च ।
- ५. आमलकम् ओजसः वर्धनं करोति ।
- ६. आलमकम् आम्लरसयुक्तम् इत्यस्मात् तेन रसेन वातं हरति ।
- ७. आमलकं मधुररसयुक्तं, शीतगुणयुक्तम् इत्यस्मात् पित्तं हरति ।
- ८. आमलकं कषायरसयुक्तं, रूक्षगुणयुक्तम् इत्यस्मात् कफः|कफं]] हरति ।
- ९. स्त्रीषु रजस्रावः वेदनायुक्तः चेत् आमलकस्य बीजं चूर्णीकृत्य मधुना सह सेवनीयम् । अथवा आमलकस्य चूर्णं वा आमलकस्य रसं वा मधुना सह सेवनीयम् ।
- १०. शिशवः दन्तानाम् आगमनसमये काञ्चित् हिंसाम् अनुभवन्ति । तस्याः निवारणार्थम् आमलकं, धातकीपुष्पस्य चूर्णं, मधु च योजयित्वा शिशूनां दन्तपाल्यां लेपनीयम् । एवं करणेन दन्ताः अपि सुन्दराः भविष्यन्ति ।
- ११. बालाः दिने दिने कृशाः, दुर्बलाः च जायमानाः सन्ति चेत् आमलाकं, कचोरं, यष्टीं, तिलतैलं च योजयित्वा तैलपाकं कृत्वा तेन अभ्यञ्जनं कारणीयम् ।
- १२. आमलकं, पिप्पल्याः चूर्णं च संस्थाप्य यवागूं निर्माय घृतेन सह सेवन्ते चेत् मलावरोधः निवारितः भवति ।
- १३. आमलकं दोषान् तेषां मार्गे एव अनुलोमनं कारयति ।
- १४. केशानां विगलने, केशाः श्वेतवर्णीयाः जायन्ते चेत्, शिरसि तुषाराणां निवारणार्थं च आमलकस्य चूर्णं जले योजयित्वा स्नानात् पूर्वं शिरसि लेपनीयम् ।
- १५. आमलकस्य रसेन आमलकरसायनं, च्यवनप्राशादीनि लेह्यानि सज्जीक्रियन्ते । तेषां लेह्यानां विधिपूर्वकम् उपयोगेन शरीरस्य रसादयः धातवः वर्धन्ते । आरोग्यम् अपि वर्धते । वृद्धाप्यस्य बाधाः निवार्यन्ते । इन्द्रियाणां दौर्बल्यम् अपि न जायते ।
- “न केवलं दीर्घमिहायुरश्नते रसायनं यो विधिवत् निषेवते ।
- गतिं स देवर्षिनिषेवितां शुभां प्रपद्यते ब्रह्म तथेति चाक्षयम् ॥“
इति चरकेन उल्लिखितम् अस्ति । तन्नाम आमलकस्य रसायनस्य विधिवत् सेवनेन न केवलं दीर्घायुः प्राप्यते अपि तु देवर्षिसमाना पदवी, क्षयरहितं ब्रह्मज्ञानं चापि प्राप्यते ।
शाकानि | ||
|---|---|---|
| शाकानि | कारवेल्लम् · शिघ्रुः · कूष्माण्डम् · कोशातकी · वार्तकी · वृन्ताकः · भेण्डा · बिम्बफलम् · पुष्पशाकम् · पर्णशाकम् · निष्पावप्रभेदः (बीन्स्) · उर्वारुकम् · महामरीचिका · कदलीकाण्डम् · पटोलः · आम्रातकम् · अलाबु · निम्बूकम् · आमलकम् · मधुरकूष्माण्डम् · गोराणी · कदलीकुसुमम् · वर्तुलकम् · छत्राकम् · राजमाषशाकम् · पालङ्कः · विदारी (नेलगुम्बळ) · जालकम् (होम्बाळे) |  |